Usapang Bataan Nukes

Usapang Bataan Nukes

Ni Perry Calara

 

Pinabubuksan ang Bataan nuclear power plant ng ilang pulitiko.

 

Tinututulan na naman ito ng mga environmentalists, civil society, at kahit ng simbahan.

 

Ito iyong nuclear power plant na pinatayo ni Marcos. Dahil sa malawakang panawagan ng sambayanan, ibinasura ni Cory pagkatapos ng unang people power. 

 

May mga nagsasabing ang pagbubukas nito ay ambag natin para mabawasan ang carbon emission para sa isyu ng climate change.  Kasi nga naman wala itong ibubugang polusyon sa hangin.  Dagdag pa, binabayaran din lang naman ang pagkakautang natin dito bakit hindi na lang pakinabangan.

 

Tanong naman ng anti-nukes, paano ang basurang nukleyar na malilikha nito.  Ang radiation mula dito ay maaaring magbunga ng mga “freak” na tao at hayop. Sa mga anti-nukes, buhay pa sa kanilang mga isipan ang Chernobyl sa Russia at ang Three mile island sa Amerika.  Kung nagkakaroon nga ng aksidente sa mga industriyalisadong bansang ito, ano pa kaya ang probability na magkaroon ng aksidente sa Pilipinas na relatibong kapos sa kaalamang teknikal.

 

Pero sa akin, hindi pa teknikal ang problema sa pagbubukas ng plantang nukleyar sa Bataan.  Ang pangunahing problema ay ang korapsyon na nangyari sa pagtatayo nito. Ginawa itong gatasan ni Marcos at kanyang mga crony na ang iba ay namamayagpag pa sa ating lipunan ngayon.  Ang korapsyon ito ang sisiguro na bukas ito sa mga nakakatakot na mga aksidente.

 

Duda ko, gagawin din itong gatasan ulit ngayon.

 

Ang nuclear energy sa Bataan ay isang teknolohiya para makuha ang enerhiya mula sa paghihiwalay ng atom sa isang elementong kimikal.  Ang paghihiwalay na ito ay nagre-resulta sa pagbibigay ng enerhiya.  Maaari naman itong  gawing mechanical energy na puwedeng maging kuryente para sa ating mga bahay at industriya.

 

Sa ngayon 14% ng kuryente ng mundo ay nanggagaling sa nuclear.  Ginagamit din ito sa mga malalaking pang-giyerang sasakyang pandagat.

 

Nakikita ko na kailangan na natin ng alternatibong pagkukunan ng enerhiya.  Hindi lang dapat tayo umaasa sa fossil fuel katulad ng gasolina. Ang Nuclear ay isa sa mga alternatibong iyan.  Kailangan lang siguro nating bantayan ang paglinang ng mga alternatibong teknolihiyang ito para makapagsilbi sa sambayanan at hindi lamang sa iilan.  Kailangan ariin ng nakararami ang teknolohiya at hindi ng iilan. 

 

Sang-ayon ako na gumamit ng enerhiyang galing sa nuclear pero hindi ako sangayon sa pagbubukas sa nuclear power plant sa Bataan.  Nagumpisa ito sa maling hakbang at ang mga susunod na hakbang para buhayin ito ay bukas na rin sa mga kapalpakan. 

 

Ang kampanya nga dapat natin ay huwag bayaran ang pagkakautang ng Bataan nuclear power plant dahil hindi naman ito napakinabangan ng sambayanan (Para sa kumentaryo, paki post lang sa http://pinoygazette.blogspot.com/ o mag email sa pmcalara@hotmail.com).

 

---

This message may contain confidential information. If you are not the designated recipient, please notify the sender immediately, and delete the original and any copies. Any use of the message by you is prohibited.